தமிழ் சினிமாவில் இந்தாண்டிலேயே இதுவரை 6 படங்கள் கொடுத்துவிட்டார் விஜய் சேதுபதி. இந்த 6-ல் 5 படங்கள் நல்ல வரவேற்பை பெற்றுள்ளன. அதுவும் சமீபத்தில் தொடர்ச்சியாக தர்மதுரை, ஆண்டவன் கட்டளை, றெக்க என 3 படங்கள் அடுத்தடுத்து சிலவாரங்களில் ரிலீஸாகியுள்ளது. இந்த மூன்று படங்கள் இப்போதும் திரையரங்குகளில் வெற்றிகரமாக ஓடிக்கொண்டிருக்கின்றன.
இந்நிலையில் விஜய் சேதுபதியின் படம் ஒன்று சர்வதேச திரைப்பட விழாவிற்கு தேர்வாகியுள்ளது. இந்தியாவில் கோவா சர்வதேச திரைப்பட விழாவிற்கு பிறகு மிகவும் பிரசித்தி பெற்றது கேரள சர்வதேச திரைப்பட விழா. கேரளாவில் 21வது சர்வதேச திரைப்பட விழா நடைபெற இருக்கிறது.
இந்தப்பட விழாவில் விஜய் சேதுபதி தயாரித்த, 'மேற்கு தொடர்ச்சி மலை' படம் தேர்வாகியுள்ளது. முற்றிலும் புதுமுகங்கள் நடித்துள்ள இப்படத்தை சுசீந்திரனிடம் உதவியாளராக பணியாற்றிய லெனின் பாரதி இயக்கியிருக்கிறார். இளையராஜா இசையமைத்துள்ளார். இப்படத்தின் பணிகள் அனைத்தும் முடிந்து ரிலீஸ்க்கு தயாராகியுள்ளது. விரைவில் ரிலீஸாக உள்ள நிலையில் இப்போது கேரள சர்வதேச திரைப்பட விழாவிற்கு தேர்வாகியுள்ளது. தான் தயாரித்த படம் ஒன்று சர்வதேச திரைப்பட விழாவிற்கு தேர்வாகியிருப்பது விஜய் சேதுபதிக்கு மகிழ்ச்சியை கொடுத்துள்ளது.
